Listahan sa makakuha sa eksaminasyon sa 2025 scholarship program ipagawas sa dili madugay

GIKALIPAY ni Konsehal Suzette Daba, chairman sa komite sa edukasyon nga ubay-ubay gayud nga mga tinun-an ang gilantaw nga makakuha sa City Scholarship Program 2025.

Kini human nasayran nga adunay 5,665 ang nagmalampusong nakasumite sa kumpletong rekisitos gikan sa Pebrero 17 hangtod March 17, 2025 diin mikabat sa 8,053 ka aplikante ang nag-aplay.Gipasabot ni Daba nga kadtong lamang mga aplikante nga nakasumite sa kompletong requirements pinaagi sa online platform ang kwalipikadong makakuha sa eksaminasyon nga sa pagkakaron ubos na sa pagrepaso ug pagsusi sa buhatan sa CDO City Scholarships Office.

Matod sa konsehal nga kun sila mahimong benepisaryo sa talagsaong oportunidad nga gihatag sa kagamhanan ilabina niadtong dili makapadayon sa kolehiyo apan adunay malantip nga salabutan, makab-ot gayod nila ang ilang gidamgo nga kurso.

Ang listahan sa malampusong mga aplikante nga mokuha sa eksaminasyon i-post sa FB page sa CDO City Scholarships Office sa dili madugay.Good luck sa umaabot nga mga iskolar sa dakbayan (IsDa) sa Cagayan de Oro, panapos ni Konsehal Daba. (RNQuiblat/SP)