Lim gustong pa-imbistigahan ang alegasyon batok kang Kap. Marlou Tabac

ANG kahigayonan nga kita maka-serbisyo usa ka dakong oportunidad apan naghatag usab kini kanato sa dakong responsibilidad.

Kini ang unod sa special report ni Konsehal Yan Lam Lim, chairman sa komite sa Barangay Affairs, atol sa sesyon niadtong lunes nga gidumala ni Presiding officer Pro Tempore Konsehal Romeo Calizo.

Sumala ni Lim nga adunay mga reklamo sa mga kawani sa Barangay Gusa mahitungod sa pagkadelatar sa ilang suholan ingon man ang pag-rediscount sa cheke ug mulo sa pipila ka contractor nga wala pa mabayare sa ilang serbisyo sa maong barangay diin gituhoang gigamit sa personal nga paagi.

Siya midugang nga dili mahimo nga iya kining piyongan nga alegasyon batok sa maong opisyal tungod kay siya pa ang kasamtangang Liga President ug klaro kini nga nakasupak sa R.A 3019 kun Anti-Graft and Corrupt Practices Act, sumpay ni Lim.

Nunot niini nga isyu giduso ni Konsehal Lim sa finance komite ug sa komite sa ethics and blue ribbon ni Konsehal Edgar Cabanlas alang sa dugang imbestigasyon ug rekomendasyon. (MLRapanot/SP)