Libreng WiFi services sa pipila ka lugar sa CDO gilantaw

GILANTAW nga matagamtaman sa mga Kagay-anon ang libreng wireless internet kon Wireless Fidelity (WiFi) services sa pipila ka lugar dinhi sa dakbayan.

Kini human giuyonan sa Konseho sa Syudad ubos ni Bise Mayor Kikang U yang ordinansa nga naghatag og katungod ni Mayor Oscar Moreno pagpirma sa Memorandum of Agreement (MoA) alang sa WiFi services tali sa Innove Communications, Inc.

Ang maong lakang naglangkob sa panagtambayayong sa dakbayan ug sa Innove alang sa pag-instalar ug pag-deploy sa Wireless Internet Services sa gitumbok nga unom ka mga publikong fasilidad sa syudad.

Dugang niini, si Konsehal Edgar Cabanlas mihangyo nga unta malakip ang City Hall, Divisoria Plaza ug Gaston Park sa mabutangan sa maong libreng internet services.

Iyang gipasabot nga kasagaran ang katawhan anaa magtapok o’ magbisita ug mag-enjoy kauban sa ilang pamilya, amigo ug amiga ug angayan lang nga mabutangan usab sa libreng internet.

Niini, si Konsehal Ian Mark Nacaya misugyot nga ipadala sa buhatan sa mayor ang hangyo ni Cabanlas aron makonsiderar ug malakip sa expansion program sa Innove ug sa dakbayan.