Hangyo sa Dansolihon NHS Principal giaksyonan ni Konsehal Legazpi

GITINGUHA  ni Konsehal Al Legaspi, Sr., chairman sa komite sa urban poor, nga masolusyonan ang hangyo sa Principal sa Dansolihon National High School sa paghawan sa nahabilin nga istraktura sa tindahan atubangan sa ilang eskwelahan.

Kini ang gibutyag sa konsehal atol sa miaging tigom samtang giduso sa komite pagbalik ngadto sa konseho sa Barangay Dansolihon sa tuyo nga mahatagan sa patas nga aksyon ang maong butang tali sa eskwelahan ug sa tag-iya sa tindahan.

Atol sa tigom sa komite, giklaro sa representante sa buhatan sa Building Official nga  walay gi-aprobahan nga building permit alang sa maong istraktura. Samtang ang buhatan sa City Engineer mibutyag nga anaa mismo gitukod ang maong tindahan sa cadastral road sa dapit.

Niini gihangyo ni Konsehal Legaspi ang Konseho sa Barangay nga mapangitaan sa pamaagi ilabi na ang posibleng luna nga kabalhinan sa maong tindahan aron usab makapadayon sila sa pagpamaligya alang sa ilang panginabuhian. (RNQ/SP)