Lakang sa Lumbia manganlan mga dalan girekomendar

PABORABLENG girekomendar sa komite sa Roads and Traffic Management ni Konsehal Romeo Calizo ang lakang sa barangay Lumbia nga ngalan ang mga dalan sa ilang barangay.

Sa tigom sa komite kagahapon, giduso ngadto sa komite sa pamalaod ni Konsehal Ian Mark Nacaya ang gipalabang nga ordinansa sa barangay alang sa maong katuyuan aron masukip sa agenda sa konseho sa umaabot nga sesyon.

Subay sa ordinansa sa barangay, lima ka mga dalan ang pasiunang ginganlan pahinungod sa niaging mga gobernador sa probinsya sa Misamis Oriental ug kanhi mga kapitan sa barangay.

Kini agig pasidungog sa ilang naamot sa kaarangan ug kalamboan sa barangay.

Niini, si Konsehal Romeo Calizo nanawagan sa mga opisyal sa barangay pagsumete sa gikinahanglang sertifikasyon nga magpamatuod sa pag-uyon sa katawhan sa maong lakang.