Lakang pagtukod og satellite offices sa CDRRMD, Oro Rescue padayong tun-an

PADAYONG tun-an sa komite sa Climate Change Adaptation and Mitigation and Disaster Risk Reduction ni Konsehal John Michael Seno ang lakang pagmugna og satellite offices sa CDRRMD ug Oro Rescue 911 diha sa barangay Lumbia ug Agusan.

Kini human napakyas ang gimugnang Technical Working Group (TWG) pagpresentar sa plano ilabina sa pagpili sa lokasyon, pagtukod sa mga straktura ug uban pang gikinahanglan alang sa maong katuyoan.

Matod ni Seno nga gikanahanglan na sa labing daling panahon ang plano kay sobra na gyud ang kapiot sa trapiko paingon sa Barangay Lumbia ug esteng bahin sa dakbayan.

Dugtong sa konsehal nga kini maoy hinungdan sa pagkalangan sa pagresponde sa pagkuha sa mga biktima sa aksidente ug uban pang mga emerhensya.

Mapuslan kaayo sa katawhan sa dakbayan ang laraw kay kun adunay opisina sa CDRRMD sa Lumbia ug Agusan mas madali ang serbisyo sa pagtubag sa mga emerhensya diha sa Distrito 1 ug Distrito 2, dugang ni Seno.

Niini, subling gitahasan ni Seno ang TWG pagsumite sa tanang gikinahanglang rekomendasyon ug gitakdang masumete ang plano sa sunod nga tigom. (RNQuiblat/SP)