Kontrata sa basura angayan tan-awon -Abbu

BUOT ni Konsehal Joey Abbu, Jr., chairman sa komite sa labor and employment, nga tan-awon usab ang legal isyu kalabot sa koleksyon sa basura dinhi sa syudad.

Kini ang iyang gibutyag atol sa sesyon niadtong Lunes nga gidumala ni City Vice Mayor Bebot Rodriguez agig reaksyon sa taho ni Konsehal Imee Moreno kabahin sa problema sa basura sa syudad.

Gipasabot ni Abbu nga tungod kay gihatag man sa kagamhanan ang obligasyon pagkolekta sa basura ngadto sa Tencil, angayan makita ang kontrata tali kanila ug sa dakbayan.

Dugtong sa konsehal nga bisan pa man wala niya nakita ang maong kontrata apan sigurado si Abbu nga kon mapakyas ang Tencil sa ilang katungdanan sa pagkolekta sa mga basura, adunay katugbang nga silot niana.

Matod ni Abbu nga medyo makalibog ang pahayag ni CLENRO Head, Engr. Armen Cuenca nga iyang gikutlo “halos ang driver ug palero absent kuno mao nang daghan backlog ubay-ubay tungod sa panghitabo, daghan kwarta ang palero moundang, kana bitaw’ng mentality nga kung makasapi pwede na dayon moundang kay dako-dako pud baya ang ilang nasapi”.

Kon kini ang panghitabo subay sa pamahayag ni Engr. Cuenca tungod sa  pag-absent sa mga personahe sa Tencil, makonsiderar kini nga adunay pag-breach sa kontrata tali sa Syudad nga angay tan-awon alang sa posibleng pagpahamtang sa silot. (RNQuiblat/SP)