Konseho miuyon sa Birth Registration Assistance Project

HINIUSANG giuyonan sa Konseho atol sa regular sesyon niadtong Lunes nga gidumala  ni Bise Mayor Bebot Rodriguez ang ordinansa nga naghatag katungod ni Mayor Klarex Uy sa pagpirma sa Memorandum of Agreement (MOA) tali sa kagamhanan sa dakbayan ug sa Philippine Statistics Authority (PSA), nga girepresentahan ni Undersecretary Claire Dennis S. Mapa ug Regional Director Janith C. Aves.

Ang MOA naglangkob sa pagpatuman sa Birth Registration Assistance Project (BRAP) dinhi sa dakbayan sa Cagayan de Oro.

Tumong sa maong MOA ang civil registration sa mga tawo gikan sa marginalized ug underserved sector, ilabina ang mga sakop sa Indigenous Peoples (IP), Muslim Filipinos, ug ang labing kabos nga sektor sa katilingban.

Ang BRAP maoy usa sa mga dagkong programa sa PSA nga gitumong sa pagsiguro nga ang tanang pagpanganak, ilabina kadtong gikan sa mga pamilya nga nahisakop sa labing kabos nga sektor, marehistro gayod sa Local Civil Registry Office ug ma-enrol ngadto sa PhilSys National Identification System.

Kini nga proyekto dakog ikatabang sa paggarantiya sa legalidad sa ilang pagkatawo, pagsiguro nga aduna silay PhilIDs diin kini ang ganghaan alang kanila sa pag-angkon sa ilang sosyal nga mga benepisyo ug pagpasayon sa pag-access sa mga serbisyo ug programa sa gobyerno. (RNQ/SP)