Konseho miindorsar mabulag ang CDONHS-Senior High School

GILANTAW nga labing mapalambo  ang  pagtunol sa dekalidad nga edukasyon ngadto sa mga estudyante sa Cagayan de Oro National High School- Senior High School diha sa Barangay Nazareth.

Kini human ang konseho sa sesyon niadtong Lunes nga gidumala ni Bise Mayor Bebot Rodriguez misagop og resolusyon  nga nag-indorsar ug misuporta  nga mabuwag ang  Cagayan de Oro National High School -Senior High School  gikan sa iyang mother school nga Cagayan de Oro National High School- Junior High School diha sa Barangay Nazareth, ning syudad.

Si Konsehal Suzette Magtajas-Daba, Chairman sa Komite sa Edukasyon ug usa sa nagpaluyo sa maong lakang  mipasabot nga kon mabuwag na kini gikan  sa iyang mother school ug mahimo nang independente nga tunghaan makabaton na kini sa  kaugalingon  pundo gawas nga makabaton nausab og   kaugalingong  opisyal nga school  ID.

Ang maong resolusyon gipalabang sa Konseho alang sa maong katuyuan nga gipaluyuhan usab sa Komite sa Pamalaod ni Konsehal Edgar Cabanlas.