Konseho mihangyong mapadali pagpalambo sa Laguindingan Airport

“UNTA mapaspasan ang pagpatuman sa proyekto pag-upgrade sa Laguindingan Airport.”

Mao kini ang unod sa special report ni Konsehal Edgar Cabanlas atol sa sesyon sa konseho niadtong Lunes nga gidumala ni Bise Mayor Bebot Rodriguez.

Gipasabot sa konsehal nga dili maka-akomodar sa gidaghanon sa demand sa mga pasahero ang maong airport ilabina nga kini ang port of entry sa Mindanao ug kinahanglang ma-improbar ang pasilidad niini. Matod ni Cabanlas nga mas mapalambo pa ang ekonomiya kun susama sa ubang airport sa nasud ang Laguindingan nga makatubag sa panginahanglan sa mga pasahero.

Niini, duha ka resolusyon ang gipasaka sa konseho nga nanawagan sa nasudnong kagamhanan pinaagi sa buhatan sa Department of Transportation (DOTr) ug Civil Aviation Authority of the Philippines (CAAP) nga mapadali ang pagpalapad ug pag-upgrade sa Laguindingan Airport. Dugang resolusyon ang gisagop nga naghangyo sa Sangguniang Panlalawigan sa Misamis Oriental nga masuportahan ang maong panawagan.