top of page

Konseho miawhag masukip FSL sa curriculum sa kolehiyo



Hugot ang panawagan sa konseho sa dakbayan sa Cagayan de Oro nga masukip ang pagtudlo sa Filipino Sign Language (FSL) sa pipila ka kurso sa kolehiyo ingon man sa vocational courses.


Kini human gipasaka sa konseho sa sesyon niadtong Lunes nga gidumala ni Bise Mayor Bebot Rodriguez ang resolosyon nga nag-awhag sa Department of Education (DepEd), Commission on Higher Education (CHED), ug Technical Education and Skills Development Authority (TESDA) pagsukip sa FSL isip usa sa mga subject sa curriculum sa kursong teacher education, nursing/medical ug criminology ug uban pang vocational courses.


Sa sesyon, si Konsehal Girlie Balaba, usa sa nagpaluyo sa gipasakang resolosyon, mipasabot nga ang maong lakang nunot sa probisyon sa Section 4 sa Republic Act No. 11106 nga nagdeklara sa FSL isip national sign language sa mga Filipino Deaf ug official sign language sa gobyerno sa tanang transaksyon nga maglambigit sa mga adunay kabilinggan sa pandungog ug nagmando sa paggamit niini sa mga tunghaan, broadcast media ug mga trabahoan.


Matod sa konsehal nga aron mahatagan sa katumanan ang balaod, gikinahanglang makat-onan ang maong mga sinyales sa tinguha nga maabagan ang mga tawong adunay kabilinggan sa pandungog.


Ang resolosyon nga gipasaka sa konseho alang sa maong katuyuan gipaluyuhan usab sa komite sa edukasyon ni Konsehal Suzette Magtajas-Daba ug komite sa pamalaod ni Konsehal Ian Mark Nacaya.

Comments


bottom of page