Konseho giuyonan paghatag insentibo sa taga Brgy. Macabalan magdala og pasidungog

Hiniusang gisagop sa Konseho sa Syudad ubos ni Bise Mayor  Bebot Rodriguez ang ordinansa sa Barangay Macabalan nga maghatag insentibo sa mga estudyante sa nasangpit nga barangay nga magdala og  pasidungog  sama sa latin honors, topnotchers sa bar ug board exam lakip na usab ang mga atletang makakuha ug medalya.

Gipasabot nga tumong sa maong programa mao nga makapadasig ug makapaagni kini sa mga kabatan-onan nga maningkamot sa ilang pagtoon aron makab-ot ang ilang mga pangandoy sa kinabuhi nga maoy makahaw-as sa kalisod.

Alang sa mga latin honors madawat niini P10mil ug plake niadtong summa cum laude, P7,500.00 ug plake sa magna cum laude, P5mil sa cum laude. Makadawat usab og P10mil ang top 1 sa board exam; P7,500.00 sa top 2 ug P5mil sa top 3.

Lakip sa gipundohan alang sa mga atleta nga makakuha ug medalya diin P10mil sa gold medal, P7,500.00 sa silver medal, ug P5mil sa bronze sa international competitions.

Ang maong ordinansa sa  Macabalan miagi sa makuting pagtuon sa mga hintundang komite sa

konseho og nasuta nga nahiuyon sa balaod og mahimo nang ipatuman sa labing dali nga panahon.

Subay niini, ang konseho  misagop  og resolusyon  alang sa maong  katuyoan nga gipaluyohan sa komite sa barangay affairs ni Konsehal Yan Lam Lim ug sa komite sa pamalaod ug reglamento ni Konsehal Edgar Cabanlas. (MLRapanot/SP)