Konsehal Tabac nangusog nga mapadali ang pag-implementar sa ordinansa sa Puerto

GIHINGUSGAN ni Konsehal Marlo Tabac, chairman sa komite sa barangay affairs sa konseho, nga mapadali sa Brgy. Puerto ang pag-implementar sa ilang ordinansa  nga nag-regulate sa pagkolekta sa mga basura ug nagpahamtang og multa sa makalapas niini.

Sa tigom sa komite niadtong Martes, ang buhatan sa City Legal mipadayag sa ilang suporta sa maong ordinansa tungod kay segun sa Section 16 sa Akta Republika 7160, gi- require man ang mga lokal nga kagamhanan nga mopalabang og ordinansa nga magpromote sa panglawas ug kaayohan sa komunidad.

Gibutyag usab sa taga-City Local Environment and Natural Resources Office (CLENRO) nga nalipay sila sa maong lakang nga magkolekta ang barangay og garbage collection fee apan hugot  nilang  gisugyot ang pag-establilsar og Material Recovery Facility (MRF) ug sa pagbaton sa sestima diha sa pagkolekta sa basura.

Niini, gisugyot ni Tabac  nga aron mapadali ang ilang ordinansa, ilang imbitahon ang taga-CLENRO ug City Finance atol sa ilang sesyon aron direkta kining makahatag sa ilang opinion ug rekomendasyon ug makatabang diha sa pagpalambo sa mga probisyon sa ilang ordinansa. (JRG/SP)