Konsehal Salcedo nangusog maresolbar ang alegasyon nga gibato kang Congressman Klarex Uy

HUGOT nga gikahingawa ni Konsehal Enrico Salcedo, chairman sa komite sa Environment and Natural Resources, ang isyu ug mga aligasyon nga gibato kang Congressman Rolando “Klarex” Uy nga giingong anaa siya sa Drug List sa Philippine Drug Enforcement Agency (PDEA) sa mga politiko nga gapayuhot sa ilegal nga druga.

Sa sesyon sa konseho niadtong Lunes nga gidumala ni Konsehal Edna Dahino, gipasupot sa konsehal ang iyang special report mahitungod sa maong isyu nga giingong nakatugaw sa kahusay ug kalinaw sa syudad.

Gipasabot sa konsehal nga kinahanglan nga maresolbar kini nga isyu labina nga nakahatag kini’g kadaot sa nahisgutang pamilya tungod dili kini tiaw tiaw nga isyu gawas pa nadaot kini sa dungog ug integridad sa maong opisyal.

Dili pwede nga sayon sayonon lang ang pag-akusar tungod dako kinig damyos sa dungog ug integridad, pamahayag ni konsehal Salcedo.

Niini, gihangyo sa konsehal ngadto sa nag-akusar ang pagtunol sa maong listahan ug kon ugaling mapamatud-an nga tinood ang alegasyon andam siya nga mokanaog sa pwesto isip konsehal sa syudad.