Konsehal Salcedo mipasalamat sa CHEMCO

HUGOT nga gipasalamatan ni konsehal Enrico Salcedo, chairman sa komite sa Cooperative sa konseho ang City Hall Employees Multipurpose Cooperative (CHEMCO).

Kini tungod sa ilang pagtunol og hinabang ngadto sa tanang aktibong miyembro sa kooperatiba human gipaubos sa IATF ang dakbayan sa Enhance Community Quarantine (ECQ) hangtod Agosto 15, 2021.

Nasayran sa panguna ni Chairperson Director Virginia Deguinion sa ikaduhang hugna miapod-apod kini og tag 10 kilos nga bugas ngadto sa mga miyembro.

Tinguha niini nga maalibyohan ang panginahanglanon sa mga miyembro tungod sa maong krisis, pamahayag ni Salcedo.

Mahinumdoman nga ang kooperatiba sa miaging tuig una nang mitunol og tag 10 kilos nga bugas dili lang sa mga miyembro lakip na ang pipila nga benepisaryo nga naapektuhan sa maong pandemya.

Matod ni Dir. Deguinion nga bisan ginagmay lang kini pero makatabang na nga makapahupay sa gihambin nga kalisod sa mga miyembro.

Niini si konsehal Salcedo kusganong mipaabot og pasalamat sa CHEMCO sa ilang makanunayong pag-abag sa kagamhanan labina niining panahon nga gisagubang ang pandemya.