Konsehal Legaspi misuporta sa Pista sa Nayon sa Bonbon

Misalmot si Konsehal Al Legaspi, Sr. sa gihimong Pista sa Nayon sa Barangay Bonbon, nga kabahin sa TambaNipa Festival, nunot sa pagsaulog sa pista sa ilang barangay.

Sa iyang mensahe, giila ni Konsehal Legaspi ang kamahinungdanon sa maong kalihokan, nga sumala pa kaniya, “dili lamang usa ka adlaw sa kasadya apan usa usab ka pagsaulog sa atong kultura, tradisyon, ug panaghiusa isip usa ka komunidad.”

Gipadayag usab sa konsehal ang iyang pagpasalamat ug kalipay nga nahimong kabahin sa maong selebrasyon.

Sa gabii sa pista, nagkatigom ang mga residente gikan sa nagkadaiyang purok aron ipakita ang ilang mga talento pinaagi sa Pinoy cultural dances ug sa pagpaambit sa lamian nga pagkaon, nga naghatag ug dugang kalipay ug nagpalig-on sa panaghiusa sa komunidad. (SPE/SP)