Konsehal Daba napili isip mamuno sa komite sa edukasyon

IPADAYON ni Konsehal Jing Daba ang nasugdan nga mga programa ni kanhi Konsehal Suzette Daba, isip chairman sa komite sa edukasyon pinaagi sa pagpalapad sa mga programa sa natad sa edukasyon aron sa pagtabang sa kabatan-onan nga makakab-ot  sa ilang gidamgo sa kinabuhi.

Kini human hiniusang giuyonan sa Konseho atol sa inaugural session niadtong Lunes nga gidumala ni Bise Mayor Bebot Rodriguez ang Resolusyon No. 15422-2025 nga nagpili sa Chairperson, Vice Chairperson ug mga Miyembro sa Standing Committees subay sa Internal Rules of Procedure (IRP) sa 21^st City Council.

Ang maong komite gitahasan nga magtuon, mag-imbestiga ug magreport sa mga butang ug mga lakang, lakip ang gisugyot nga mga ordinansa o resolusyon bahin sa edukasyon, ang pagtukod, pagmentinar ug operasyon sa mga eskwelahan, kolehiyo ug unibersidad, librarya ug museyo; non-formal ug formal nga edukasyon sa komunidad.

Buot sa konsehal nga makatutok sa kabatan-onan sa paghatag gahum, pagpalambo sa paugnat sa kusog, pagtunol serbisyo og oportunidad nga makapahimulos sa programa sa dakbayan ilabina kadtong anaa sa ubos sa hut-ong sa katilingban ug sa mga hinterland barangays. (RNQUiblat/SP)