Konsehal Daba nabalaka sa epekto sa face shield sa kinaiyahan

HUGOT nga nahingawa sa Konsehal Reuben Daba sa epekto sa padayong paggamit sa face shield ngadto sa kinaiyahan.

Sa sesyon sa konseho niadtong Lunes nga gidumala ni Bise Mayor Kikang Uy, gibutyag ni Daba nga niadtong Disyembre sa tuig 2020 gimando sa gobyerno ang paggamit sa face shield sa tanang higayon isip dugang proteksyon aron nga malikayan nga matakbuyan sa Covid 19 virus.

Sumala ni Daba nga ang iyang kabalaka dili mahitungod sa efikasiya o dugang ba nga pas-anon sa katawhan kon dili ang epekto niini ngadto sa kinaiyahan.

Matod ni Daba nga nalimtan na sa kadaghanan nga ang face shield sama lang sa plastic nga non-biodegrable nga makadaot ug tungod niini siya nabalaka sa mga posibleng epekto niini ngadto kinaiyahan.

Gipasabot ni Konsehal Daba nga iyang nasabtan ang katuyuan sa paggamit sa face shield isip proteksyon apan dili usab mahimo nga baliwalaon lang ang epekto niini ngadto sa kinaiyahan.