Konsehal Abbu pabor imbestigahan ang reklamo pagdili pagsuot og hijab sa tunghaan
“BASIN ang magtutudlo lang ang nagdili walay labot ang tunghaan.”
Kini ang gibutyag ni Konsehal Joey Abbu, Chairman sa Komite sa Labor, atol sa miaging sesyon sa Konseho nga gidumala ni Bise Mayor Bebot Rodriguez agig reaksyon sa taho ni Konsehal Girlie Balaba kabahin sa reklamo sa duha ka Muslim nga nursing students sa usa ka unibersidad nga giingong gidid-an ug wala tugoti pag-apil sa mga demonstrasyon sa klase tungod sa pagsul-ob sa ilang mga hijab o headscarves.
Matod sa konsehal nga klaro man ug nahilatid sa Artikulo 3 sa konstitusyon nga gawasnon ug walay diskriminasyon ang magpadayag sa ilang pagtuo. Adunay academic freedom ang tanang tunghaan pero ang maong freedom kinahanglan balanse usab ngadto sa matag katungod sa usa ka indibidwal labina ang paghimo sa pamaagi sa ilang relihiyosong pagtuo, dugang pamahayag ni Abbu.
Niini, gisuportahan ni Konsehal Abbu ang lakang nga paimbistigahan ang reklamo ug naglaum nga mahatag ang patas nga aksyon ug rekomendasyon.