Konsehal Abaday gitudlong chairman sa komite sa public safety

SI konsehal Roger Abaday mao karon ang bag-ong chairman sa Komite sa Public Order and Safety sa Konseho hulip ni Kanhi Konsehal Romeo Calizo.

Kini human gisagop sa konseho sa sesyon kagahapon nga gidumala ni Bise Mayor Bebot Rodriguez ang resolosyon nga  nagpili sa mga chairman, vice chairman ug mga membro sa  komite  nga nahilatid sa ilang Internal Rules of Procedure kon IRP.

Maoy vice chairman sa komite si Konsehal Al Legaspi uban ang mga  membro nga sila Konsehal Edgar Cabanlas, Enrico Salcedo ug Yvy Emano.

Lakip sa tahas sa komite ang pagtuon, pag-imbestigar ug pagtaho sa tanang hisgutanan ug lakang lakip na ang mga sugyot ordinansa ug resolusyon nga may kalabutan sa kahusay ug kalinaw ingon man usab ang mga lakang nga mapugngan ang mga kadaot sa kinabuhi ug kabtangan lakip na ang mga panghitabo nga may kalabutan sa sunog ug ang pagpugong niini.

Gilauman nga  ubos sa pagpangulo ni Abaday, iyang palapdan ug hugtan ang kampanya sa dakbayan kontra kriminalidad.