Komite sa urban poor magtigom karong Huwebes

SA unang higayon, magtigom karong alas 10:00 sa buntag, Huwebes, ang komite sa urban og rural poor ubos ni Konsehal Al Legaspi.

Tipik sa ilang tukion mao ang Civil Case No. 90-520 (Ayala Corp. vs. Heirs of Romeo Villanueva ug Heirs of Rustom Lago, et. al).

Kini human nadawat ang notice of writ of demolition nga giisyu sa Regional Trial Court of Misamis Oriental Branch 17 niadtong Mayo 12, 2022 nga naglambigit sa usa ka luna diha sa Barangay Bayabas.

Nasayran nga gitumong ang pagpatuman sa maong writ of demolition sa Hulyo 30, ning tuig ug naghangyo sa presensya sa mga awtorisadong representante uban sa koordinasyon sa National Housing Authority (NHA).

Gilauman ni Konsehal Legaspi nga mahatagan kini sa rekomendasyon ilabina mahitungod sa relokasyon ug suporta sa naapektohan nga mga pamilya.

Gipaabot nga motambong sa  tigom ang mga sakop niini sila si Konsehal Juancho Pascual, Roger Abaday, Paolo Gaane, Imee Moreno, Edgar Cabanlas, Aga Suan, Bise Mayor Bebot Rodriguez ug ang mga hintundang ahensya ug mga hepe sa buhatan sa City Hall aron makuha ang ilang opinion alang sa tukmang rekomendasyon. (RNQ/SP)