Komite sa Public Works mangitag paagi masulbad problemas dalan

KONSIDERAHON karong adlawa atol sa tigom sa Komite sa Public Works nga dumalahon ni Konsehal Edgar Cabanlas ang sulat ni Kapitan Marlo Tabac sa Barangay Gusa.

Ang maong kapitan nagsulat sa komite ug nagpatabang pagsulbad sa  problema sa road right-of-way tali ni Jay Sogoc ug Rudolin Caipang, mga molupyo sa Purok 11, Mangga Cluster sa  maong barangay.

Giingon nga si Sogoc ang nagdumili paghatag og dalan ngadto sa iyang silingan nga si Caipang  hinungdan nga nahimo kining problema sa ilang  dapit.

Niini, gidapit  sa komite  pagtambong sa tigom  aron mapangitaan sa solusyon sila si Jay Sogoc, Rudulin  Caipang, City Administrator Hilario Roy Raagas, Engr. Ma. Rosanna Rodriguez sa Office of the Building Official ug Engr. Joel Momongan sa City Engineer’s Office.