Komite ni Abaday motuki sahangyong sabong sa Indahag

KONSIDERAHON sa komite sa games and amusement ubos ni Konsehal Roger Abaday ang hangyo ni Mr. Victor Cabeltes, representante sa Indahag Square Garden alang sa special permit sa pagpahigayon og 3-cock combo cockfighting sa Indahag sa umaabot Hunyo 24, ning tuig pahaum sa kapistahan sa nasangpit nga barangay.

Gilauman sa komite nga andam na ang mga dokumento sa Indahag Square Garden ug masiguro nga mahiuyon kini sa ordinansa sa syudad una kini maduso sa hawanan sa Konseho.

Ang maong matang sa kalihokan dili lamang magdalag kabibo ug mag-agni sa mga mahiligon sa sabong sa syudad kun dili makatabang usab sa pagpalambo sa lokal nga ekonomiya ug sa natad sa industriya sa turismo.

Gidapit sa maong tigom sila si Kapitan Marlon Fidel Bongay, Jr. sa Barangay Indahag, City Administrator Atty. Roy Hilario Raagas, ug City Legal Officer Atty Kenneth O. Tamala aron magpaambit sa ilang panahom ug opinyon. (FDCalotes/SP)