Kapakyasan sa Cogon police, gikadismaya sa konseho; bag-ong commander gisugyot

“Kapakyasan sa tibuok pwersa sa Cogon Market Police force, usa ka buhat sa mga talawan ug dili kini nato ma-tolerate.”

Kini ang gibutyag ni Konsehal Edgar Cabanlas, majority floor leader atol sa sesyon sa konseho niadtong Lunes agig reaksyon sa panghitabo kabahin sa pag-atake sa panon sa mga tawo ug sa pagkulata sa PUJ driver nga nalambigit sa traffic incident nga mikalas sa kinabuhi sa usa ka nuybe (9) anyos nga bata diha sa Cogon Public Market area.

Matod ni Cabanlas nga kini usa ka dili maayo nga talimad-on nga walay pagtahod sa lagda sa balaod nga nalapas ug kini usa ka buhat sa kagubot sa kadalanan sa dakbayan nga duol pa gyud kaayo sa maong police station.

Ang syudad nanginahanglan og mga pulis nga maisogon sa pagpatuman sa balaod ug ipakita sa katawhan nga anaa sila kanunay nagbantay sa mga lihok sa komunidad.

Gikinahanglan nga adunay kaisog nga police commander ang ma-assign diha sa Cogon area kay kini usa ka dapit nga kasagaran adunay pagkagubot, sumpay ni Cabanlas.

Niini, usa ka resolusyon nga gipangamahanan ni Konsehal Edgar Cabanlas ang giuyonan sa konseho nga nag-awhag ni P/Col. Dexter G. Paje, City Director, Cagayan de Oro City Police Office, nga i-relieve  ang  Police Commander sa Cogon Public Market Police Station tungod sa iyang walay katakos sa tahas nga miresulta sa pag-atake ug pagkulata sa PUJ driver nga nalambigit sa traffic incident sa Cogon public area. (RNQ/SP)