Kalangan sa pagrelease RPT share sa brgy sulbad na, Abaday

DAKO ang pasalamat ni Konsehal Roger Abaday, chairman sa komite sa Senior Citizens, nga nasolusyonan na ang pagka delatar sa pagrelease sa pahat sa mga barangay sa Real Property Tax (RPT).

Kini human nalingkuran ug natuki sa joint komite sa Barangay Affairs ni Konsehal Alam Lim ug komite sa panalapi ni konsehal Edna Dahino ang gipaabot nga mulo sa mga barangay.

Sa sesyon sa konseho niadtong Lunes nga gidumala ni Bise Mayor Kikang Uy, si Abaday mipadayag sa iyang pasalamat nga nasulbad na ang maong problema.

Nagtoo si Abaday nga posibleng sa mga ginagmay nga kakulian sa pagsumite sa mga gisitar nga rekisitos alang sa ilang pahat sa Real Property Tax ang hinungdan maong iyang gihangyo ang mga kapitanes sa barangay nga sutaon kanunay ang ilang mga panudlanan aron kanunay kini nga ma-update.