Kalamboan sa Puerto market di na madugay

HAYAG na ang kalamboan ug kaarangan sa merkado publiko dinha sa barangay Puerto. Kini human nakompleto na ang pagtrabaho sa unang bahin sa proyekto sa redevelopment ug modernization sa merkado nga mobalor og P88.5 milyones. Nasayran nga gipahigayon sa miaging semana ang puhada alang sa ikaduhang bahin sa proyekto nga mobalor og P100 milyones. Si Konsehal Ian Mark Nacaya, chairman sa komite sa economic enterprises, mibutyag nga gibanabanang makompleto ang pagtrabaho sa proyekto sa ikaduhang kwarter sa tuig 2023. Ubos sa plano sa bag-ong merkado mao ang modernong fish ug meat sections, fruits ug vegetables section, espasyong parentahan ngadto sa mga magpapatigayon, kiosks, food stalls ug uban pa. Dako ang pasalamat ni Nacaya kang Mayor Oscar Moreno, mga sakop sa Konseho sa panguna ni Bise Mayor Kikang Uy ug sa tanang nagtrabaho aron magmalampuson ang proyekto. Ang konsehal usa sa mga naningkamot nga mapundohan ang modernisasyon sa merkado dinha sa Puerto sa tinguha nga matagamtaman sa mga Kagay-anon ang hamugaway, limpyo ug modernong mga fasilidad.