Kalamboan, kaugmaran sa Brgy 32 gilantaw

DUGANG kalamboan ug kaugmaran ang gipaabot nga masinati sa katawhan sa Barangay No. 32.

Kini human gisagop sa Konseho sa syudad ubos ni Bise Mayor Kikang Uy sa sesyon niadtong Lunes ang resolusyon nga nag-uli sa ordinansa sa barangay diin nasukip ang ilang 2022 Annual Budget nga adunay gibana banang kinitaan ug galastohon balor P5.35 milyones kapin.

Lakip sa gihatagan og prioridad sa barangay nga mapatuman karong tuiga mao ang pagrehabilitar sa ilang Materials Recovery Facility ug drainage; pag-instalar sa mga suga sa kadalanan ug paglimypo sa mga kanal.

Migahin usab ang barangay og igong pundo nga magamit panahon sa kalamidad, pagpatuman sa mga programa sa Sangguniang Kabataan ug uban pang programa nga magpalapad sa serbisyo sa ilang ginsakopan.

Ang resolusyon nga gisagop sa konseho alang sa maong katuyuan gipaluyhan sa Komite sa Barangay Affairs ni Konsehal Yan Lam Lim ug komite sa Pamalaod ni Konsehal Ian Mark Nacaya.