Kahigayonan nga makatungha di angay sayangan - Pascual

KITANG tanan adunay mga damgo apan aron matuman ang mga damgo kinahanglan kini og daghang determinasyon, dedikasyon, disiplina sa kaugalingon ug hugot nga pagpaningkamot.

Kini ang gipadayag ni Konsehal Jay Roa Pascual, chairman sa komite sa Turismo, atol sa gipahigayong Basic Orientation Leadership Training Seminar (BOLTS) ug pagpanumpa sa mga opisyal sa City Scholars sa Barangay Bonbon, ning syudad.

Matod niya nga dili sayangan ang kahigayonan nga nakapahimulos sa programa nga mahimong Iskolar sa Dakbayan kay dalan kini nga makab-ot ang gipangandoy sa kinabuhi.

Niini, si Pascual hugot nga mipahimangno sa tanang iskolar nga ampingan ang kahigayonan kay ang paghupot sa maayong edukasyon ang usa sa magdala sa mahayag nga kaugmaon sa kinabuhi.