top of page

Kagay-anong nakapasundayag sa Italian Opera gipasidunggan

GIPASIDUNGGAN sa Konseho sa Syudad ubos ni Bise Mayor Bebot Rodriguez ang Kagay-anong nakapasundayag sa Italian Opera didto sa Savoi, Campobasso, Italy.

Sa sesyon sa konseho niadtong Lunes, gisagop ang resolusyon nga nagpahalipay ug nagpasidungog ni Professor Cipriano de Guzman, Jr. sa naangkong kalampusan sa iyang Italian opera debut niadtong Septembre 23–24, 2023 sa II Barbiere di Siviglia (The Barber of Seville).


Si Konsehal Suzette Magtajas-Daba, nangamahan sa resolusyon, mibutyag nga si de Guzman, sa Liceo de Cagayan University Conservatory of Music, Theatre, and Dance, ang unang Pilipino nga nakapasundayag sa Italian opera human milabay ang 16 ka tuig.


Gibutyag nga unang nakapasundayag sa maong opera house ang usa ka Filipino-American tenor nga si Arthur Espiritu niadtong tuig 2007.


Si Konsehal Suzette mipasabot nga ang kalampusan ni de Guzman nagdala dili lang og garbo sa dakbayan kun dili sa tibouk nasud.


“Unta makaaghat kini sa kabataan ilabina niadtong adunay talento ug mahiligon sa pagkanta nga maninguhang makab-ot usab ang mga gidamgong kalampusan,” pamahayag ni Konsehal Suzette.


Comentários


bottom of page