Kabugohan Festival tun-an sa komite ni Lim

GIHINGUSGAN sa Konseho sa Barangay  Bugo nga mapreserbar ug mapalambo ang kasaysayan, kabilin ug tradisyon sa katawhan sa ilang barangay.

Kini human nadawat sa Konseho ubos ni Bise Mayor Bebot Rodriguez ang gisumiteng ordinansa sa Brgy. Bugo nga nagdeklarar sa matag unang adlaw sa bulan sa Mayo alang sa ilang tinuig nga kulturanhong kalihokan nga pagatawagon isip Kabugohan Festival.

Tumong sa barangay nga pinaagi sa maong selebrasyon mapasundayag ang kasaysayan, kostumbre, panginabuhi, mga talento, abilidad ug magpalig-on sa panaghiusa sa katilingban ug industriya sa turismo sa barangay.

Ang maong ordinansa giduso ni Bise Mayor Bebot Rodriguez ngadto sa komite sa barangay affairs ni Konsehal Yan Lam Lim alang sa dugang pagtuon og rekomendasyon. (RNQuiblat/SP)