Judith supak sa dugang paglugway pagdumala sa IGM, BOD sa COWD

Suportado ni Konsehal James Judith, chairman sa komite sa arbitration, ang resolusyon nga nagpadayag  sa pagsupak sa lakang sa Local Water Utilities Administration paghatag og dugang lugway sa pagdumala sa Interim General Manager ug mga Interim Board of Directors sa Cagayan de Oro Water District.

Kini ang gipadayag ni Konsehal Judith atol sa sesyon niadtong Lunes nga gidumala ni Presiding Officer Pro Tempore Konsehal Romeo Calizo agig reaksyon sa special report ni Konsehal Edgar Cabanlas pagkondena sa LWUA tungod sa pag-abuso niini sa katungdanan.

Sumala ni Judith nga dugay na niining gihangyo ang LWUA nga maghatag sa insaktong katin-awan aron malamdagan sa maong isyu kabahin sa paglugway sa IGM ug BOD apan subo kay walay tubag nga iyang nadawat butang nga nagpabilin ang iyang pagsupak tungod kay  nagpabilin ang kasamok sa maong buhatan nga nakaapekto  sa operasyon ingon man sa mga kawani sa COWD.

Niini gisugyot ni Judith ang duha ka butang, una ang pagdeklara sa buhatan sa LWUA nga persona non grata ug ang paghangyo sa korte nga mapadali ang desisyon nga maoy gilaumang makapahupay sa isyu sa Cagayan de Oro Water District.

Hinuon,  giuyonan sa Konseho  nga ihikling una ang pagdeklara isip persona non grata aron sa paghatag sa dugang kahigayonan sa LWUA ug  ipadayon ang pagsulat sa korte nga hangyoong  mapadali ang pagluwat sa desisyon sa kaso alang sa maong katuyuan.  (MLRapanot/SP)