Judith naninguha matubag mga alegasyon sa giapod-apod nga Covid-19 cash aid


Padayon kitang motuki aron makab-ot ang kamatuoran sa giapod apod nga cash assistance o’ ayuda sa Covid-19 niadtong panahon nga gipailalom ang dakbayan sa Cagayan de Oro sa Enhanced Community Quarantine (ECQ).

Mao kini ang giluwatan ni Konsehal James Judith, chairman sa gimugnang Adhoc Committee sa komite sa social services, sa tigom niadtong milabayng adlaw nga gitambongan sa kadagkoan ug mga representante sa buhatan sa DSWD-10, CSWD, City Legal, City Administrator, City DILG, City Budget, City Accounting, City Finance ug Community Affairs.

Sa tigom, ang taga-DSWD-10 mibutyag nga 100 porsyentong nakompleto na ang pag-disburse sa kapin P767.8 milyones nga cash assistance nga na-download sa ahensya pabor sa kagamhanan sa dakbayan.

Niini, si Judith nangita og katin-awan sa namatikdang doble dobleng ngalan sa mga nakadawat sa ayuda ingon man mga ngalan nga anaa sa listahan apan matod pa wala usab makadawat.

Sa iyang bahin, ang representante sa CSWD mipasabot nga ang maong double entries nahimo tungod kay ang ubang mga encoder wala na mag-update sa entry apan naghimo og bag-ong entry aron madugang ang mga ngalan sa tibouk pamilya. Iyang gipasabot nga sa maong mga double entry, dili man doble ang nadawat nga ayuda kun dili ang angayan lang nga madawat matag pamilya.

Gani, matod niya, ang CSWD nagpadala usab og demand letters ngadto sa mga nasuta nga doble gayud ang nadawat ug adunay nibalik ug niuli sa sobra sa angayang madawat nga ayuda.

Sa pagtapos sa tigom, si Judith mipasalig sa padayong pagtuki sa resulta sa giapod apod nga ayuda sa tinguha nga mapaabot sa katawhan ang tinuod nga kahimtang niini.