Isyu sa ticketing ug vehicle clamping sa Pueblo de Oro,padayong gisusi sa joint committee meeting

GIPAHIGAYON ang joint committee meeting sa social services ug public utilities nga gipangulohan ni Konsehal Jonjon Rodriguez ug Konsehal Eric Salcedo aron padayong susihon ang tanang aspeto sa balaod may kalabotan sa mga isyu batok sa Pueblo de Oro Association of Commercial and Institutional Establishments (PACE).

Kini ang ikaduhang higayon nga nagkatigom ang maong mga komitiba kalabot sa reklamo sa giingong diskriminasyon batok sa Persons with Disabilities (PWDs), lakip na ang isyu sa pay parking, ticketing, ug vehicle clamping sa Pueblo de Oro Business Park.

Sa maong miting, gipresentar sa PACE ang ilang position paper nga gipangayo sa komitiba, apan wala kini naglakip sa mga attachment nga mahimong basihan sa maong dokumento.

Nabutyag usab nga sulod sa lima ka tuig, wala magdeklara og gross income ang PACE ug gi-report nga “zero” ang ilang kita, base sa mga dokumento nga gihatag sa Business Permits and Licensing Division (BPLD).

Gipahimangno sa konseho ang BPLD ug Road and Traffic Administration (RTA) nga magsumite sa ilang rekomendasyon sa dili pa moabot ang adlaw’ng Biyernes, samtang gihatagan og direktiba ang PACE nga ipasa ang ilang kulang nga requirements ug annexes.

Gisugyot usab ang duha ka semana nga suspensyon sa ticketing ug clamping sa maong lugar samtang nagpaabot sa sunod nga committee meeting. (JDO/SP/Photos from Councilor Rodriguez's FB page)