top of page

Isyu sa doluna tali’s Iligan City gihisgutan



Gihisgutan sa Komite sa Arbitration ni Konsehal James Judith II ang isyu kalabot sa doluna sa Tignapoloan, ning dakbayan ug Sitio Malumpayad, barangay Rogongon, Iligan City.


Sa tigom sa komite sa milabayng semana nga gitambongan ni Konsehal Betsy Maria Zalsos sa Iligan City, gibutyag nga ang Tribal Council sa Malumpayad mireklamo sa gilaraw nga pagtukod og Tribal Tulugan sa Tribal Council sa Tignapoloan, Cagayan de Oro tungod kay matod pa nakalapas kini sa teritoryo sa Iligan City.


Sa tigom, si Kapitan Nancy Aban sa Tignapoloan mipadayag sa iyang kalipay nga mahisgutan ang isyu sa komite aron mahatagan sa kalinaw ang pundok sa mga lumad ug malikayan ang panagbangi ilabina kay mga kabanay ra usab sila.


Niini, iyang gipasabot nga ang gilarawng Tribal Tulogan gibalhin na sa Upper Tignapoloan human ang Kagamhanang Nasyonal diin naggikan ang pundo pagtukod sa proyekto misugyot nga ibalhin ang dapit diin tukuron ang proyekto aron malikayan ang kasamok.


Hinuon, si Judith misugyot nga subling tukion ang isyu ug nanghinaut nga makatambong sa sunod tigom ang kadagkoan sa DENR tungod kay sila ang labing nasayod sa mga utlanan.


“Ang tumong ug tingoha nga makab-ot ang kasulbaran pinaagi sa han-ay ug malinawon nga pamaagi tungod kay kitang tanan lumalabay lamang,” pasabot ni Judith.


Sa iyang bahin, mapasalamaton si Konsehal Zalsos sa paghatag og daling aksyon sa konseho dala ang paglaum nga mapatunhay ang panaghiusa sa tanan ilabina nga ang dakbayan sa Cagayan de Oro ug Iligan mga managsuong syudad man.

Comments


bottom of page