Hatagan sa gahum, kapasidad ang mga brgy pagpatuman sa balaod -Bebot

Nganong dili man hatagan sa gahum ug kapasidad ang mga barangay sa pagpatuman sa mga balaod sa syudad.

Mao kini ang sugyot ni Bise Mayor Bebot Rodriguez sa taho ni Konsehal Girlie Balaba kalabot sa reklamo sa katawhan kontra kasaba gikan sa mga bars ug restaurants nga natukod sa mga residential areas.

Bisan sa akong panahon isip Kapitan sa Barangay Nazareth permi gyud kini nga reklamo ug hangtud karon nagpadayon kini nga problema sa barangay, dugang sa bise mayor.

Matod ni Balaba nga magbuntagay gayud nga kasaba dinha sa mga bars ug restaurants nga nahatag og kahasol sa mga nanimuyo duol niini. Dugay na gyud kaayo kini nga problema ug wala nagkulang ang barangay sa pagpahigayon sa mga pahimagno apan dili gyud motuo kining mga operator sa mga establisamento.

Busa hatagan nato sa gahum ang barangay aron dili sila mahadlok sa pagpasirado ilabina nga anaa naman ang reklamo sa mga molopyo nga dili sila makakatulog tungod sa kasaba sa maong mga establisemento, pamahayag ni Bise Mayor Bebot Rodriguez.