Hangyo sa XU nga malibre pagbayad sa amusement tax, giuyonan sa Konseho

PABORABLENG giuyonan sa Konseho sa syudad ubos ni Bise Mayor Bebot Rodriguez sa sesyon  kagahapon ang ordinansa nga nag-exempt sa Dulaang Atenista, Xavier University-Ateneo de Cagayan nga girepresetahan sa ilang production Manager Shene C. Nacalaban lll  sa pagbayad sa amusement tax.

Ang Dulaang Atenista mopasundayag og dula sa entablado nga giulohan og “How Reunion Works” diha sa Xavier University Little Theater gikan sa Hunyo 12-14, ning tuig.

Ang maong kalihukan dako  og ikatabang aron makab-ot ang student formation ug paghatag gahom sa mga local artist sa ilang tumong nga  maedukar ang mga manan-away samtang gina-promote ang arte, kultura ug ang pagkamamugnaon.

Ang maong pasundayag magsilbi usab nga fund raising activity tungod kay ang kitaon niini gamiton man sa pagbayad sa nagasto sa set installation, props materials, costumes ug sa pagkaon sa  tibuok produksyon ug ang mahabilin gamiton usab sa umaabot pang produksyon.

Ang ordinansa nga gipalabang sa konseho alang sa maong katuyuan gipaluyuhan sa Komite sa Ways and Means ni Konsehal George Goking ug Komite sa Pamalaod ug Reglamento ubos ni Konsehal Edgar Cabanlas. (JRGalano/SP)