Hangyo sa tag-iya sa lote dihas Bulua giaksyonan ni Legazpi

DALING giaskyonan sa komite sa urban and rural poor sa konseho ubos ni Konsehal Al Legazpi ang sulat ni Reynaldo Gonzales nga naghangyo matabangan sa pagnegotiate sa mga settlers nga nag-okupar sa ilang lote  nga nahimutang diha sa Barangay Bulua nga adunay gilapdon dili mominus sa 7,609 metros kwadrados.

Sa tigom sa komite niadtong Biernes, ang sinaligan ni Gonzales mipasabot nga kamolo karon ang pagproseso sa pagpatitulo sa  ilang lote ug usa  sa gisitar nga rekisitro sa Communitry Environment and Natural Resources (CENRO) sa Initao  mao ang affidavit of quitclaims gikan sa mga okupante sa  ilang lote.

Matod sa administrador sa Barangay Bulua   nga  gaduha duha og pirma ang mga settlers tungod kay wala nila masabti ang katuyoan sa maong affidavit ug naniguro usab sila nga sila gayud ang baligyaan niini sa panahon nga  mapatitulohan  isip mga okupante sa taas taas nga panahon.

Hinoon matod sa sinaligan nga kon makapahimo na sila, mohatag silag kopya sa draft ngadto sa komite.

Niini gihangyo ni Legazpi ang sinaligan ni Gonzales sa pagduso og kopya sa draft sa maong affidavit ngadto sa komite  sa labing dali nga panahon  aron  matun-an sa buhatan sa City Legal ug makaluwat sa ilang insaktong ekplinasyon ug mapasabot ngadto sa mga settlers.

Hinoon ang mga settlers sa maong lote andam nga magpaabot  sa  maong draft aron usab  ilang mapasabot ang ilang mga sakop. (JRG/SP)