Hangyo sa mga taxi driver gitagad sa kom. sa Public Utilities

GIHATAGAN og pagtagad ni konsehal Eric Salcedo, chairman sa komite sa Public Utilities, ang hangyo sa mga taxi driver ug operator sa syudad.

Kini human si Mr. Bernie Jamaca, Presidente sa Cagayan de Oro First Taxi Drivers Alliance (CAFETADA), mipaabot sailang mulo atol sa tigom sa komite niadtong milabayng adlaw diha sa hawanan sa konseho.

Una niini nga unta masumpo na ang nagka daghan nga mga colorum taxi units nga namasahero sa syudad.

Ikaduha, nga unta mahatag na kanila ang ilang fuel subsidy ug ang pag-calibrate sa ilang meter nga maoy  hinungdan sa panaglalis tali sa pasahero ug driver.

Niini, si Atty. Mohammad Hassam Sarip, Assistant Regional Director sa Land Transportation Franchising and Regulatory Board (LTFRB-10), mibutyag nga hugot ang ilang kampanya batok sa colorum taxi ug kabahin sa ayuda, misumite na ang ilang opisina sa dugang 2,285 ka mga benepisaryo ngadto sa ilang central office.

Nunot niini, gihanyo ni Konsehal Eric Salcedo ang tanang taxi driver og operator nga motuman sa mga rekisitos ug gabayangikan sa LTFRB aron makapahimulos sa maong programa sa goberno. (MLR/SP)