Hangyo sa JFY pagpahigayon og derby giduso sa Legal Office

GIDUSO sa komite sa games and amusement sa konseho ubos ni  Konsehal  Roger Abaday ngadto sa City Legal Office ang hangyo sa JFY Bebel Promotion nga matugotan pagpahigayon  og Stag Derby sa umaabot Oktubre25 ning tuig diha sa Indahag Square Garden nga nahimutang sa Sitio Lomboy, Barangay Indahag, ning syudad.

Sa tigom sa komite niadtong Martes, ang representante sa promoter mibutyag nga ilang rentahan ang  maong sabungan samtang ipahigayon nila ang maong derby.

Ang representante sa City Legal Office mipasabot nga segun sa ordinansa, gitugotan lang ang pagpahigayon og derby diha sa mga lisensyadong sabungan sa adlawng Dominggo ug sa  mga regular holidays gikan alas 9:00 sa buntag ngadto sa alas 10:00 sa gabii.

Hinoon, gibutyag ni  Abaday nga lisensyado ang maong sabungan apan kinahanglan kini nga iduso una ngadto sa CLO alang sa ilang opinyon.

Niini, giduso  sa komite ang maong aplikasyon ngadto sa CLO aron matun-an ug makaluwat sa ilang  opinyon  ug rekomendasyon alang sa maong katuyoan. (JRG/SP)