Hangyo sa GOFETCO tun-an sa technical working group

GIDUSO ni Konsehal Eric Salcedo ngadto sa Technical Working Group (TWG) ang hangyo sa Golden Friendship Eco-friendly Transport Cooperative (GOFETCO) nga dugang unit sa sakyanan ug Rota aron magmalahutayon ang ilang operasyon.

Nasayran nga ang maong transport coop nakasinate sa kalisod tungod sa daghang kompetisyon sama sa bao-bao, habal-habal ug traditional jeep nga moagi sa ilang rota, matod ni Robert Travilla, vice chairperson sa maong asosasyon, atol sa tigom sa komite niadtong milabayng semana.

Sumala ni Salcedo nga kinahanglan tun-an pag-ayo ang maong hangyo aron masuta kon dili ba kini makadugang sa problema sa dagan sa trapiko sa dakbayan tungod kay nakadaghan na ang mga sakyanan.

Niini giduso ni Konsehal Salcedo ang hangyo sa maong asosasyon ngadto TWG nga gilangkoban sa Roads and Traffic Administration ug uban pang opisina sa goberno alang sa dugang pagtuon ug rekomendasyon. (MLR/SP)