Hangyo sa CEMHA giaksyonan ni Konsehal Legaspi

GITINGUHA ni Konsehal Al Legaspi, Sr., chairman sa komite sa urban poor, nga mahatagan sa solusyon ang hangyo sa Camp Evangelista Movants Homeowners Association (CEMHA) nga ma-reclassify ang ilang gisugyot nga relokasyon diha sa Barangay Baikingon.

Kini ang gibutyag sa konsehal atol sa miaging tigom sa komite diin ilang giduso ug gitahasan ang buhatan sa City Housing and Urban Development Department (CHUDD) sa pag-asister kanila sa pagskuha sa gikinahanglang rekisitos alang sa maong katuyoan.

Matod ni Legaspi nga ang maong asosasyon apektado sa demolisyon nga gipahigayon pipila na ka tuig ang milabay diha sa Camp Evangelista, Barangay Patag, busa angayan nga maplastar ang mga sakop niini.

Gidapit sa sunod nga tigom sa komite ang tag-iya sa maong luna, ang buhatan sa Department of Agrarian Reform, City Planning and Development Office, ug ang onseho sa Barangay Baikingon aron madungog ang ilang mga hunahuna bahin sa gihangyo nga re-classification sa gitumbok nga lote. (RNQ/SP)