Hangyo sa CASIMODA nga makapamasahero giduso sa RTA

GIDUSO ni Konsehal Eric Salcedo, chairman sa komite sa public utilities, ang sulat-hangyo sa CASIMODA Association Inc. nga matabangan aron makakuha og permit alang sa ilang grupo sa habal-habal nga nag-operate diha sa Barangay Camaman-an ug naga alley dinha sa Osmena-JR Borja Street sa Barangay 38 ning syudad.

Atol sa tigom sa komite, gipaabot ni Mr. Ramil Lago, presidente sa maong kapunongan, nga sa pagsugod sa ilang operasyon aduna silay panugot sa barangay pinaagi sa pag-isyu sa  resolusyon alang sa maong matang sa operasyon tungod kay nakita niini ang panginahanglanon sa sakyanan sa mga residente sa dapit.

Gikahingawa sa mga habal-habal driver ang pagsita ug gidid-an sila sa pag-alley sa mga sakop sa Roads and Traffic Administration (RTA) tungod kay nakalapas kini sa lagda sa trapiko.

Nunot niini, gihangyo ni Konsehal Eric Salcedo ang mga kadagkoan sa RTA nga mapangitaan og pamaagi nga matabangan ang mga habal-habal operator alang sa ilang matag adlaw nga panginabuhian. (MLR/SP)