Hangyo nga makunhuran surety bond sa travel agencies, ubnp tukion

SUBLING tukion atol sa tigom karong alas 10 sa buntag sa komite sa turismo ni konsehal Jay Pascual ug komite sa ways and means ni konsehal George Goking ang hangyo sa mga negosyanteng nalambigit sa tourism industry.


Ang mga travel agencies ug uban pang tourism stakeholders mihangyo nga unta makunhuran ang surety bond nga gipahamtang sa kagamhanan sa dakbayan ngadto kanila subay sa Ordinance No. 5239-96.


Buot sa mga magpapatigayon nga makunhuran gikan sa P500 mil ngadto sa P200 mil ang maong surety bond tungod kay labing naapektohan ang operasyon sa ilang mga negosyo niining nasinating pandemya.


Hinuon, si Pascual mipadayag nga dako gayud ang epekto sa pandemya sa tourism industry ilabina sa mga travel agencies nga nahunong ang operasyon tungod sa kadaghan sa mga limitasyon nga gipahamtang sa gobyerno aron malikayan ang pagkaylap sa COvid-19.


Gidapit nga motambong sa tigom sila si city treasurer Jasmin Maagad, city legal officer Atty. Jose Sabanal, OIC city tourism officer Chedilyn Aissa Dulguime ug local economic & invesment promotions officer Eileen San Juan.


Gipaabot usab nga motambong ang kadagkoan sa Oro Chamber, COHARA, tour & travel operators ug ubang stakeholders aron makakuha ang ilang opinyon ug panahom aron makuha ang gikinahanglang aksyon.