Goking: Tabangan ang informal businessmen nga mahimong legal ug rehistrado

DILI sayon ang pagsugod og negosyo, ilabi na kung kulang sa kahinguhaan ug ang kalisod sa agiang mga  proseso sa pagkuha og business permit.

Kini ang gibutyag ni Konsehal Christopher George Goking, chairman sa komite sa trade og commerce human iyang namatikdan nga daghang informal ug gagmay’ng mga negosyante sa dakbayan nga naningkamot pagnegosyo apan naglisod gihapon sa pagtuman sa mga rekisitos diha sa paglukat og business permit.

Sumala sa konsehal  nga  pinaagi sa pagtambayayong sa mga personahe sa Business Permits and Licensing Division (BPLD) ug Executive Management Team (EMT) ilang nauyonan nga hatagan og espesyal nga pagtagad ang maong mga negosyante aron maaghat sila nga mahimong lehitimo ug rehistrado nga mga negosyante sa dakbayan.

Niini, nanawagan si Konsehal Goking sa pagtinabangay pinaagi sa pag-assist sa mga gagmayng negosyante kay dako kini og ikatabang kanila nga gusto molambo ug mahimong legal ang ilang negosyo.

Padayon ta sa pagpaningkamot nga mahimong mas inclusive, mas supportive, ug mas people-centered ang atong local business environment alang sa tanan, pamahayag  ni  Konsehal Goking. (RNQ/SP)