Goking ngadto sa mga negosyante: Ayaw hulataang deadline, ipa-calibrate inyong timbangan karon

SI Konsehal George Christopher Goking, chairman sa komite sa trade and commerce, subling nanawagan sa mga negosyante nga mosalmot sa nagpadayong digital weighing scale calibration diha sa buhatan sa City Treasurer’s Office (CTO) - Tax Mapping Division.

Ang maong calibration gisugdan niadtong Septiyembre 1 ug molungtad sa Oktubre 15, ning tuig lamang. Apil usab niini ang verification sa digital weighing scales nga gigamit sa tanang mamaligyaay diha sa pribado ug publikong kamerkadohan ug uban pang establisemento sa negosyo dinhi sa syudad.

Kinahanglan dad-on sa mga tag-iya ang mismong digital weighing scale ug magdala ug photocopy sa ilang valid nga business permit.

Ang mga timbangan nga pasado sa calibration selyohan ug hatagan ug opisyal nga calibration o’ authentication sticker isip pamatuod nga husto ang timbang niini.

Matod ni Goking kini nga inisyatibo gimugna aron masiguro ang husto ug makiangayong timbang sa mga baligya alang sa proteksyon sa mga konsumedor ubos sa Ordinance No. 15378-2026 kon Digital Weighing Scale Ordinance nga mandatory na ang paggamit ug pagpa-calibrate sa mga digital nga timbangan sa tanang publiko ug pribadong merkado.

Giawhag sa konsehal ang tanang manindahay sa Cogon, Carmen, Agora, Puerto ug uban pang merkado ug establisemento sa dakbayan sa pagtuman niini nga balaod sa dili pa ipatuman ang hingpit nga mga multa ug silot, sumpay ni Goking. (RNQ/SP)