Goking gisuportahan ang Klarex nga Merkado sa Baryo

HUGOT nga gisuportahan ni Konsehal George Christopher Goking, chairman sa komite sa trade and commerce, ang bag-ohay lang gilusad nga programa sa dakbayan alang sa sektor sa mag-uuma nga gitawag og Klarex nga Merkado sa Baryo (KMB).

Ang maong programa nga nagdala sa tema: “Abot sa Mag-uuma, Deretso sa Lamesa” sa panguna sa City Agricultural Productivity Operations Office (CAPOO) ubos ni City Agriculturist Engr. Bernie Daba Jr. gitumong alang paghatag og mas barato nga produkto sa mga konsumante gikan mismo sa mga mag-uuma.

Gikalipay usab ni Goking ang pagmugna sa Klarex nga Merkado sa Baryo kay kini naghatag og dugang kadasig, oportunidad ug kahigayonan sa local farmers nga mapalambo ingon man ang pagpalig-on sa kita, kalamboan sa komunidad ug sektor sa agrikultura.

Gipahibalo sa konsehal nga ang Klarex nga Merkado sa Baryo anaa sa matag Klarex nga Serbisyo sa Baryo ni Mayor Klarex ug diin mapalit ang mga lagutmon, talamnon, processed goods, ug uban pang produkto sa mga mag-uuma sa dakbayan. (RNQ/SP)