Goking gihingusgan ang pag-inspekyon sa sub-standard electronic Christmas decors

Gihingusgan ni Konsehal George Christopher Goking, chairman sa komite sa trade and commerce, nga ang katawhan dili makapalit og sub-standard electronic Christmas decorations ug sa ilegal nga pabuto dinhi sa syudad.

Kini ang gibutyag ni Goking atol sa miaging adlaw sa programang “Ang Inyong Konseho Karon”.

Gipasabot sa konsehal nga hapit na ang kapaskohan ug daghan na ang nagsugod og pamalit diha sa daplin-daplin nga mamaligyaay kay nakabarato lagi sila og palit sa mga Christmas lights. Apan basin mao ra pod kini ang makapasunog sa ilang tagsa-tagsa ka panimalay.

Adunay pag-inspeksyon matag karon ug unya uban sa pagtambayayong sa buhatan sa Department of Trade and Industry (DTI), CDO Price Coordinating Council, Oro Trade and Investments Promotions Center (Oro-TIPC), City Regulatory and Compliance Board (CRCB), Bureau of Fire Protection (BFP), ug uban pang ahensya sa syudad aron pagsusi ug pagsakmit sa mga item nga walay tatak nga Import Commodity Clearance (ICC) ug Philippine Standard (PS), pamahayag ni Goking.

Alayon niini, gipahinumdoman ni Konsehal Goking ang tanang mamaligyaay sa pagseguro nga ang ilang gibaligya adunay selyo aron  dili sila mamultahan subay sa balaod.

Gihangyo usab ni Goking ang katawhan nga magbinantayon sa pagsusi sa maong mga tatak aron malikayan ang mga posibleng aksidente (RNQ/SP)