Goking gidapit nga mamulong sa Bulua NHS moving up ceremony

Dako ang pasalamat ni Konsehal George Goking sa kadagkoan sa Bulua National High School (BNHS) sa pagkuha kaniya nga mamumulong sa umaabot nga Moving Up Ceremony umaabot Hulyo 7, 2023.

Ang konsehal mipadayag sa iyang kalipay nga makatabang sa kalampusan nga nakab-ot sa kabataan. Siya midugang nga angayan pasidunggan ang kabataan tungod kay mibunga ang ilang kakugi ug pag-antos uban sa walay hunong nga suporta sa ilang mga ginikanan ug magbalantay.

“Bisan ang proseso sa edukasyon walay kahumanan nagkinahanglan gayud kini sa kakugi ug pagpa-ilob sa mga hagit sa kinabuhi ilabina ang kawad-on”, sumpay ni Goking.

Siya mipaabot sa iyang kasingkasing nga pasalamat ngadto sa mga ginikanan ug nagpaluyo sa kalampusan sa kabataan, ang ilang walang hunong nga suporta, sakripisyo ug dili matukib nga gugma maoy pundasyon sa mga mogradwar dinha sa pagpadayon sa ilang gidamgong kaugmaon. Nasayran nga si Goking mao ang External Vice Chairman sa School Governance Council (SGC) sa Bulua National High School.