Giya sa pagsuot sa sapot sa mga Lumad gisugyot ni Cabaring

HUGOT nga gisugyot ni Konsehal Roberto Cabaring, chairman sa komite sa  cultural  affairs sa konseho, ang pagmugnag giya sa hustong pagsuot sa cultural indigenous attire sa mga Lumad.

Kini ang unod sa special report sa konsehal sa sesyon niadtong Lunes nga gidumala ni Bise Mayor Bebot Rodriguez.

Sumala ni Cabaring  nga kinahanglan nga mabuhatan kini sa giya  tungod kay daghan karon ang gapahigayon og  kalihokan nga gasooton ang estilo sa ilang sapot nga walay pagpananghid ug pagkonsulta kanila.

Gipasabot sa konsehal nga ang sapot sa mga lumad simbolo kini sa ilang dignidad, sa ilang pagkatawo ug ingon man sa kasaysayan nga kinahanglang respetohon.

Giklaro usab ni Konsehal Cabaring nga wala nila gidili ang pagsoot niini apan gisiguro lang niya nga dili kini maabusohan ug sa ingon madisiplina ang mga gaboot-boot lang  sa pagdesinyo nga walay konsultasyon ug pagpananghid niini.

Sumala ni Cabaring nga may namatikdan siyang mga sayop ug sipyat  diha sa paggamit sa ilang mga desinyo.

Ang maong taho giduso ni Bise Mayor Rodriguez ngadto sa komite sa cultural affairs alang sa dugang pagtuon. (JRG/SP)