Cabaring nagpabiling pangulo sa komite sa cultural communities

SI Konsehal Datu Roberto Cabaring napili pag-usab isip chairperson sa komite sa cultural communities human hiniusang giuyonan sa Konseho atol sa inaugural session nga gipahigayon niadtong Lunes nga gidumala ni Bise Mayor Bebot Rodriguez ang Resolusyon nga naghan-ay sa Chairperson, Vice Chairperson ug mga Miyembro sa Standing Committees sa Konseho subay sa ilang gisagop nga Internal Rules of Procedure (IRP).

Ang maong komite gimandoan sa pagtuon, pag-imbestiga, ug pagtaho sa tanang butang nga may kalabutan sa kultura, kaayohan ug kalamboan sa tanang Lumad, Indigenous People (IP) communities sa dakbayan sa Cagayan de Oro.

Ang komite sa cultural communities gitahasan usab sa paghimo og mga polisiya, mga plano ug mga programa nga magpasiugda ug manalipod sa katungod sa mga Lumad (IPs) ug sa ilang katigulangan, ang pagpreserbar sa ilang kabilin; mga oportunidad ug programa sa panginabuhian alang sa ilang pag-uswag ug paglambo.

Sa iyang pagkapili pag-usab, si Konsehal Cabaring magpadayon sa paghatag og dugang serbisyo alang sa kalamboan sa tanang sakop sa Indigenous People (IP) communities sa syudad. (RNQ/SP)